2017年4月14日星期五

【親子好去處】西園農莊 SaiYuen (足本 Full Version)

近年潮流興Glamping(Glamorous + Camping),上年我哋都去咗3個唔同的地方Glamping,今年知道長洲有一地方開業不夠一年,鄰近長洲張保仔洞面向鯆魚灣的「西園農莊」,佔地四十萬呎,除咗大草地大羊群,仲有好多原始的歷奇活動,夜晚仲有得瞓印第安營及蒙古包,真係一個超好玩刺激的體驗!



我哋幾乎每一年端午節都會入嚟長洲,因為要嚟捧舅父場爬龍舟。但係其他日子都真比較少入嚟玩,今次同小朋友都好期待去「西園農莊」玩。原本天公不造美,早一星期就睇見天氣預報日日都落雨,點知道到起程呢一日突然天氣變好過來,不單止冇雨仲有少少陽光又唔曬,簡直就好似秋天一樣,去Camping就最Perfect!


下晝3:00先至可以Check-in,但係都可以早少少入去玩住先,因為這個Camp Site都有提供日營,唔想過夜的朋友可以入去玩玩即日出番嚟又得。既然係豪華露營我哋都豪豪地揀咗搭快船,好快就到咗長洲啦!


要去長洲西灣,大家可以喺隔離碼頭再搭街渡(駁艇)入去,或者自己步行入去大約20-30分鐘,我哋一場嚟到梗係要試吓坐艇仔啦


講到坐艇仔,大家都要留意呀!因為碼頭兩邊都有提供街渡(往來長洲碼頭西灣/張保仔洞),右邊的$10一位,但係有2-3架艇輪流上客,一上滿人就開船


左邊的在柱上貼有「西園」字眼的,有個木牌寫住「華勝街渡」,這裡就只需$5一位,但係佢只得一架艇來回接客,搭邊架咁就睇你有幾趕時間啦!




是大家在假期日子來,街渡都會緊接來回兩邊碼頭。但在平日非繁忙時間,大家可以打電話俾船家,話佢知你要搭街渡。




至於我哋咁知慳識儉,梗係等多陣搭「華勝街渡」啦,等緊嗰陣仲遇上天后寶誕巡遊,仲有Lion Dance睇!




睇咗一陣,街渡話咁快街渡就到


搭個街渡只需10分鐘,每人$5可以慳番唔少腳骨力。而且乘搭街渡都算係其中一個體驗噢






再一次見到天氣清清涼涼,可以吹住海風慢慢去到西灣,真係舒服到震呀!




我家小姐一向都好驚搭船,今次估唔到佢搭快船又當過山車玩,搭街渡又一D都唔驚,仲同哥哥坐埋出去舢板影相




媽呀!「口裡說不,甫士卻很誠實」睇佢哋坐個姿勢,究竟邊位係陳生?邊位係陳小姐呀?


話咁快就見到西灣碼頭,因為今日係天后寶誕正日,所以周圍氣氛都特別高興


大家坐街渡要上心船頭呢個小喇叭,就嚟泊岸或者要招客嗰陣,呀叔就會響按小喇叭,真係心血少D都俾佢嚇死


一上碼頭又燒嘢又大煙又嘈...快D行過呢個廟先!


廟隔離就有個公厠,忍唔到去西園農場的就喺呢度解決咗先啦




成個天掛滿七彩旗仔超美,即刻影番張靚相先!









步行3分鐘就會來到民居,這裡有三間士多茶記,同西園只係相隔3分鐘路程,所以大家可以得閒出營過嚟醫吓肚,不過留意夜晚大約6點後就收檔㗎啦,想搵宵夜就要行番出去碼頭附近(因為6點後街渡都一樣收檔了)







當然喺度開茶記的老闆們都係呢度原住民啦,你睇佢舖後種的大樹菠蘿!




頭先茶記的地方就係山腳,走上去一條小斜路3分鐘,就會到遠西園農場




經過這個「自助美經援村」就會到達「西園農莊」


終於見到呢個招牌大紅趟門,認住呢塊古色古香「西園」牌匾,其實「西園農莊」的前身就係位於大嶼山「棕櫚灘紅番營村」,因為地主要收回用地,所以營運這個Glamping的營主要另覓地方重新經營。


而西園早在50年代,由一個船廠家族所擁有,平時都係當私人花園或用作渡假勝地。但因為已經荒了許多年,園主又希望可以保留原貌,於是兩者聯合將西園修葺,加設營地住宿、歷奇玩樂設施,在園中央位置更新增了魚菜共生生態系統,成為今天一家大細放假放電的好地方




一趟開個大閘小朋友就急不及待一支箭衝咗入去,我哋個復活之旅開始啦!




這裡也有提供日營活動,分別標準門票(12歲以上) $160; 優惠門票(3-11歲) $88



進入大紅趟門後(未入票閘前)是一個中式小庭園,真係可以喺度拍戲取景都仲得


西園佔地超過四十萬平方呎!嘩,只係睇平面圖就已經覺得大到不行了,唔知要行幾耐先可以行完全個營地?營裡設有5個不同主題營區:美洲印第安營、南非探險營、觀星圓拱屋、遊牧蒙古包及新穎樹繭,目前只有樹繭還在計劃興建中(因為那棵大榕樹意外地死去,所以要另覓適合的樹興建)

(平面圖右下角)這個樹繭最適合夫婦或情侶,可以住在樹上賞月賞星星,真係超浪漫噢! (期待期待)


入到嚟左手面就係接待處及購物中心


接待處這幅獅子壁畫超有氣勢!



接待處旁有購物中心,大家玩到攰可以在這裡歇一歇




這處是吃早餐的地方,大家於這裡住宿的話,有些營地費用已包括DIY早餐(一陣再詳細介紹)



入Camp買漏嘢隨時可以喺度補給,有點心又有波仔飯,一定唔會餓死,不過記住接待處只係開朝9晚9


杯麵、電芯、蜜糖,所有你好大機會需要的用品都可以買得到。





想飲汽水但係購物中心放咗工都唔駛驚,因為營內地方很大,在營舍附近你都會找到汽水機! 不過汽水機就唔會有啤酒啦!




另外營地都有提供手機叉電服務$20滿一次,不過建議大家最好自備尿袋




西園這個營地真係超大,恐怕要行過每一個角落都要成個鐘先得!






農場沒有特定一個地方供大家餵飼山羊,因為所有羊都係通山走,你會無意中發現一兩隻就喺你身邊,真係超Wild(稍後會介紹餵羊體驗)


農莊還設有一個很大的魚菜共生系統,將來亦會設有教育導賞,讓更多人認識環保概念



先登記Check-in,1) 大家會收到營舍及Locker鎖匙(Locker就在剛才氣勢獅子壁畫那處),2) 另有手帶及通行證 ,手帶方便職員確認入場人仕身份,3) 通行證則方便大家進出營地(晚上11點後才回營地請先早向保安揚聲) 及 4) 垃圾袋:因為營主希望Glamping得還可以保留大自然的享受,所以希望所有朋友自己垃圾自己執,唔想周圍放垃圾筒污染環境

每個營舍要先付$800按金,離開營地前會全數退還


隨意參觀一下,已經見到好多不同設施,呢兩日一夜我哋要玩齊佢!






我哋存放好行李之後第一個玩的活動就係「草地障礙弓防箭」,去到草地廣場 (東冀)見到呢棵超大超美的荔枝樹,唔影相點對得住自己呀!







呀Sir推埋裝備車仔過嚟,芊芊一見到D裝備就話係「白兵」啦!係呀,我哋一齊扮白兵啦




其實真係幾似白兵



頭盔就好似黑武士


呢個活動同樣適合小朋友玩(只要高過100cm或5歲以上)

每節活動建議人數8-12人,每人每節收費$200



大家先著上整齊裝備





哥哥都係攪唔掂要人幫手




變身做咗白兵!先生小姐,只係著咗一半咋,仲有頭盔未戴同弓箭未攞呀



穿著整齊裝備後,教練同我哋講解示範,俾大人細路都試射一下






其實我都有問弓箭應該唔會點傷害到人,點解都要戴哂頭盔咁大陣仗,其後教練話因為箭頭的海綿都有機會意外脫落,所以都有一定的危險







等咗咁耐終於開戰啦!教練分派咗男女各一隊,但係我同哥哥講「爹哋要影相拍片,你自己頂住先...」哥哥即刻臉色一沉!哈哈~





呢D咪叫有姿勢有實際囉!你睇佢幾專心咁上弓箭(雖然姿勢錯哂,而且白廢教練的苦心教導)


對手匿埋哂,點玩呀教練!



見到敵人露了破綻,可惜哥哥手弓箭射唔到咁遠距離




媽咪+芊芊這個組合真係好得意




哥哥一於少理,光明正大企喺最前線等敵人出嚟!












妹妹都不甘示弱







超刺激的攻防戰,玩到最後得番我同哥哥對戰,其他女將都射到冇哂力!





跟住第二個節目就要去到搖控船池玩「搖控機動船」,當初想想玩搖控船唔知小朋友會唔會控制唔到,撞欄咗要賠我就大鑊。原來玩的搖控船卻是利用汽水膠樽循環再用DIY的環保搖控船



同埋原來呢架船的速度並非太快,所以一般情況下小朋友都有能力控制到






當然有升級版,見到儲物室放着更多的搖控帆船,相信呢幾架就來頭不少,大家可以租用搖控船玩,每人每節$140(指定時間內最多6人同時進行)








唔好以為個搖控掣好似好PRO咁,好似芊芊咁細個一樣控制到!




唔講唔知道,營主負責人同我講,原來呢個搖控船池前身係一個泳池!估唔到今日變成一個適合一家大細玩搖控船的地方





一開始有型叔叔跟哥哥熱熱身先,教佢點樣操作搖控船



女仔即係女仔,似乎對搖控船不大感興趣





玩玩吓發現在池上有好多隻玩具鴨仔,原來係用俾大家比賽,看誰收集得多!哥哥好投入好認真,堅持要撈起所有在池上的玩具鴨



玩完1 Round的哥哥,撈起咗你隻玩具鴨,跟住再放番哂池,重新再玩過!










第二次的成績果然唔錯,仲撈到成個池唯一一隻黑色鴨,之後佢一度以為撈到就係屬於自己可以拎番屋企...貪心果然係男仔的天性



玩咗咁耐,大人細路都要醫醫肚!我哋離開咗營地落咗山腳(只需3分鐘 ),揀了一家士多坐低抖一抖,食下串燒($12-15一串)兼大粒魚蛋($5一粒)













食過少少嘢休息咗一陣,我哋又上番山用通行證"DO"入閘,繼續我哋第一日餘下的節目



可愛的小朋友,即使入閘都變成他們其中一樣小玩意(其實同平時八達通咪一樣)



接近黃昏時侯,我哋參加了一個「非洲鼓樂基礎課室」,位置是「文藝工作坊」就在接待處的右手邊的一大片草地,活動未開始兩小無猜喺度捉草蜢



估唔到剛才在左邊草地見到棵荔枝樹,在這裡又發現一棵千葉紅,有影相位又要打番張卡先




我家公子小姐自細就成日跟我遊山玩水,所以對大自然一切都從不害怕,見到草蜢都會夠膽捉上手






估不到開始玩非洲鼓前,兩個自己自創一個小玩意


非洲Sir(唔記得問佢咩名)未到,佢哋兩個就不停打喺度攪亂檔!





芊芊見哥哥拎住鼓棍打得咁開心,就要過嚟一齊玩!



非洲鼓+夕陽真係無得頂!





非洲Sir一步一步教大家打非洲鼓,有陣時夾集D唔鹹唔淡廣東話,引到大家都勁笑



話時話唔識用力都會打到隻手板幾痛!



教完大家基本拍打動作,就一段一段咁教我哋,最後一氣呵成JAM咗首歌!





仲會同大家玩D小遊戲,捉D輸咗的朋友仔出嚟跳舞! 雖然在這裡大家都互不相識,但係現場的氣氛及環境令到大家都放低拘束,一齊玩音樂享受大自然!







小朋友都超鍾意非洲Sir,但係芊芊同佢影相的時侯幾緊張怕醜! 哈哈哈~



打完鼓營火會又未開始之前,我哋見到有人整乞兒雞(正名:叫化雞),所以八卦走過去睇吓!

將醃好的雞用泥土和荷葉包裹好,用烘烤的方法製作,是江南最馳名的菜式,不過我哋今次行程都比較緊密,所以未有機會製作乞兒雞,希望下次再來可以試吓!




無機會等隻雞出爐,我哋要趕住番過去,因為營火會要開始啦!





火起了!即刻覺得自己變咗紅蕃...如果要換埋非洲裝就無得彈!






今次非洲Sir唔係教打鼓,係教大家點樣釋放自己走出嚟跳舞!無規條、無拘束、無限制,想點玩就點玩,打鼓又得,跳舞又得,咩都唔做又得,就這樣輕輕鬆鬆開開心心過了精采的黃昏





大家睇吓個日落幾靚,西園正位於長洲的西邊,所以在這裡欣賞日落就一流,只係今天多雲所以睇唔到鹹蛋黃跌落海


玩咗成個下晝終於要番營舍休息啦,仲記得我開場白有講,今次我哋係住蒙古包,以往試過南非營、印第安營同埋露營車,所以特別期待這一次Glamping


西園蒙古包有大(20呎)有細(16呎),三個都只係用簡單木欄隔開,所以好似隔離鄰舍咁,好Warm呀!



每個蒙古包後都設有獨立洗手間,十分方便!





非常乾淨而且唔會有蛇蟲鼠蟻,最怕小昆蟲的媽媽們一定唔駛驚。另外會有熱水供應,而且一開即有,水力又夠,這個野外浴室同屋企沖涼一樣咁方便!



 


而且仲有風筒超貼心!




希望下一次再來到西園農莊,樹繭有機會完成,又或者可以試下觀星圓拱屋,兩個感覺都好浪漫,一定係另外一種享受!





蒙古包空間好闊敞,內裡設備齊全,兩張好舒服的雙人床連小床頭木櫃


大家最擔心的冷氣問題,尤其大熱天時,如果瞓在蒙古包內一定又熱又焗,但係這個冷風機只有太凍無唔夠凍,自己可以調節溫度。


有個三支竹製成的原來係掠衫架,萬一要洗衫都有個竹籮掠D衫出去曬




仲有兩張籐椅同埋中間的餐枱,有咁多張櫈就算叫埋朋友入嚟坐下玩下都一定夠位  



營內提供一盞手提營燈及4支水

蒙古包頂有設蚊網,上面有一個玻璃罩,方便晚上瞓在床上都可以賞月!




床櫃上放了一營4伙的毛巾、牙膏牙刷、沐浴露、洗頭水及護髮素,毛巾上都有簡單民族圖案,一齊用品都好配合整個蒙古包的特色!




入營前已預先訂購了營地安排的燒烤包,爐具及餐具全部一早預備好放在營外桌上





由豬扒雞翼到茄子蔬菜,甚至海鮮都有,多個款式提供任你揀,所以無論你係健康形或食肉獸,總有一款啱食!(註:如果少量調味料或食油,可以事先查詢接待處有沒有提供)





食物質素一D都唔差,全部都好好食!仲有安格斯牛,我只係燒佢半成熟,加少少鹽(自備),已經好食到不得了,加上在購物中心買幾罐啤酒!呢一晚真係Enjoy到不得了,影埋呢張相我都已經收工慢慢歎了






小朋友就一個二個沖涼舒舒服服在蒙古包內歎住BBQ玩UNO




玩咗全日放電都七七八八,一上床唔駛去分鐘就瞓着!攪掂佢哋之後,大人就繼續在外BBQ賞月,這次體驗真係好難忘!





話咁快到咁第二朝,兩個瞓到...仲有一隻臭腳加料




兩個小朋友超開心,因為原來我們的蒙古包後就係羊欄




俾兩隻羊發現咗我影佢哋添...





 佢哋隔住個鐵絲網隨手拔下地上的小草就餵飼牠們



以前一直都好怕餵羊的芊芊,次次都要哥哥陪住先夠膽,今次真的長大了!




哥哥就見慣大場面,就算拎住條草短過手指尾都照餵,仲話俾呀羊條脷舔到...咦!







兩個刷完牙洗完面就已經急急搵嘢玩!




你哋就精力無限,難為大人們又要執定行李又肚餓!





哥哥好利害,拉出超大的泡泡







蒙古包營舍已包括了4位免費DIY早餐,有牛奶、麥皮、橙汁、燒賣、烚蛋、多士,仲有一個好特別的蛋腸機



我自己都係第一次見呢部機,做法係將香腸放進機上的小洞,然後倒入蛋漿,完成後蛋腸會自動慢慢升起,超攪笑!



如果仲唔夠可以試吓飲杯白咖啡醒醒神㗎!當然你仲可以選擇落去山腳茶記食番碗沙嗲牛麵(不過10點先開檔)


開始我哋第二日早上第一個節目啦,我哋大人細路兵分兩路各自玩,先租借架滑步車俾芊芊玩,哥哥就跟住大人去玩平衡車!



芊芊戴上甲蟲頭盔裝備個樣超可愛!芊芊比較少玩未係控制得好好,不過這架滑步車十分安全,令我可以好放心








哥哥跟媽咪上去大草坪玩平衡車,同樣要先著好安全裝備




而且這個教練也超爆笑好多爛GAG!讓整個活動變得更不一樣


兩母子似模似樣,兩個都好快上手,控制得好好!





哥哥很快上手,甚至控制得媽咪仲好!唔知係咪小朋友冇咁多顧慮,反而大人處處怕弄傷,所以來得更小心,就不夠放鬆去玩玩。








再到下一個節目都係大人細路各自玩,小朋友玩完一個動現在就來一個靜,在手工藝工作坊製作迷你印第安營,哥哥都好有心機設計屬於的自己的印第安營






製作完成了! (右二) 顏色好鮮艷十分配合這大自然環境


另一邊大人去咗邊? 就係去咗玩樹頂走廊,起初大家企喺草地望上嚟都唔覺得驚,但係原來親身上陣玩的時侯真係好恐怖,我就有藉口話要拍嘢影相所以唔玩,陳太就俾我逼咗上去親身玩一次。(多謝您呀!)

教練先協助我們著好所有裝備,然後教大家如何用安全扣。大家先到練習區實習一次,然後才真的上陣! 

不過今天剛碰上一小插曲,因為在我們前另有一班小學生玩樹頂走廊,而玩的過程只可以讓每一個人完成一小段才讓下一位參加者出發。由於樹頂走廊分成多段,難度由淺進深,中途有幾個小學生去到第4-5段,因太害怕要中途退出,又有些因害怕要停留很久去克服心理障礙,雖然讓我們等了大半小時才可出發,但係都十分欣賞西園職員們在下面替小朋友打氣加油,並沒有因為他們阻礙後面的人出發而催逼他們或勸他們放棄。即使小朋友父母叫他害怕就下來,但職員反倒鼓勵小朋友堅持嘗試。結果最後小朋友完成最後一段滑過對面,全農莊目睹這情況的朋友都鼓掌歡呼,那刻鐘連我都有少少感動眼濕濕!

陳太終於出發,第一段是穿過繩網陣冇難度,所以佢仲可以擺出靚Pose



佢好驚驚緊張嗰樣我就唔放出街喇, 等佢又完成咗一半路程氣定神閒再影佢一幅淡定樣



因為剛才提及的那小學生停滯不前,所以媽咪只有企在樹上位置等待,小朋友完成手工藝後,我就向接待處借了一巨型層層叠讓他們在草地上邊玩邊欣賞媽咪飛索!!






芊「我執到了靚靚花」


最後所有小學生都終於完成了,媽咪就要扣上滑輪飛過對面,哥哥同芊芊都喺下面替媽咪加油



媽「我飛啦....」





上晝的節目都完成了,我們都係時侯要執拾離營了。這個時侯芊芊跟我到周圍走一走,一起去餵羊!



芊芊拎起一根葉出發去搵羊羊!





剛好遇著一隻全農莊最老的羊伯伯!




現在的芊芊已經不怕羊了! 行得咁近都唔怕



然後我哋跟住職員哥哥去參觀一下其他營舍,希望下次可以再有機會到訪農莊住其他營舍! 這個是南非營(中/大)








南非營(加大/家居版)





印第安營多適合於秋冬,不過都有好多外國人會於春夏選擇印第安營,讓小朋友體驗一下! 



每個印第安營都印上不同代表性的動物,如飛鷹、獅子、狼、鹿等













我咁怕熱要我住就唔好攪! 喺度打卡呃個Like就得



這個觀星圓拱屋我好鍾意呀! 希望下一次有機會可以住在這裡,不過如果咁啱有隻狗喺出邊行過,你都咪話唔驚...哈哈~ ~









外面同樣設有獨立洗手間及餐桌洗盥盆




在這裡可以望到暸闊海景,老土都要講番句「真係令人心廣神怡」



附近放着大量木柴,係用來營火會用!




這邊亦有公眾洗手間及浴室,更設有汽水及零食自動販賣機,方便大家毋須每次到購物中心買嘢






最後我們又借來豆袋跟小朋友在草地上玩玩!






這個「泡泡足球」我哋今次就玩唔到,因為小朋友未合乎身高標準! 嘻







整個旅程算做完結(點解咁隱晦?哈),我哋放低行李落番去山腳茶記食Lunch




西灣小食店,一般炒粉麵飯都會有,喺度醫飽個肚再離開!


食完上番去拎行李走人,經過快樂之友士多又忍唔住入去買咗兩枝孖條




點解我頭先話個旅程算結束,因為當我哋番上去拎番行李走的時侯,小朋友們都唔捨得離開,要繼續留喺度玩多一陣


















最後玩到四點幾,到我話「再唔走就要慢慢行番出去長洲碼頭」佢哋就即刻起身走人,離開時接待處會每人俾番一張黃色咭"DO"閘離開




我哋乘搭普通船豪華位好滿足地回程番屋企lu...





Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10


呀劍評語: 雖然要搭兩程船好似遠咗少少,但係其實都唔駛1個鐘就到達。另外營地真的超大超Wild,絕對有逃離城巿回歸大自然的感覺。而且去一次都玩唔哂,就算再嚟都可以有完全唔一樣的感覺。(特別最讚係所有工作人員都超Nice服務態度,任何需要都會盡量協助你,務求令你有個最難忘最愉快的旅程)

地點

香港長洲西灣西園農莊

網址

www.saiyuenfarm.com

開放時間
日間園地門票開放時間:9:00am - 7:45pm
營舍開放時間:8:00am - 11:00pm

服務時間
客務中心:9:00am - 8:00pm
營舍服務:8:00am - 9:00pm

入營時間
3:00pm - 7:00pm

退營時間
9:30am - 11:30am 

西園場內購物中心營業時間
9:00am - 9:00pm
商品供應:飲品,食品,零食,雪糕,早餐食品,個人護理用品,防晒用品,生活雜貨,燒烤野餐用品,玩具,小禮品等等


如欲租用營具、場地設施、或參與場內活動,請聯絡西園預訂辦事處,電話: 2981 1010 或 電郵箱: booking@saiyuenfarm.com 。

營舍收費










Remarks :

- check-in time 3:00 pm-7:00 pm, check-out time 9:30 am-11:30 am 
- including free shower & locker 
- including entry ticket & enjoy 15% off for all Sai Yuen activities & venue bookings 
* extra beds subject to charge. Single bed $300 per night & double bed $600 per night.

活動收費




Facebook
saiyuenfarm

電話

2666 9556/ 2986 0344

電郵

wcchan@saiyuenfarm.com

(以上資料更新至文章當日)





沒有留言:

發佈留言

Related Posts Plugin for WordPress, Blogger...